KHAWTHLIR

Aizawl khawpui chhunga October 26, Thawhṭannia Covid-19 No Tolerance Fortnight kalpuiah Traffic police-te chuan dan bawhchhia mi 376 an man. Mi 376 aṭang hian mi 197 chu a hmunah pawisa chawitir an ni a, mi 179 chu chawi nghal tur an neih loh avangin seizure list pek an ni. Mi 197-te pawisa chawi belhkhawm chu Rs. 50,300 a ni.

Central KṬP-in KṬP kumpuan 'Pathian hnaih' tih puala nizan aṭanga November 1, 2020 thleng zan tin 'Pathian Hnaih Hapta' live crusade neih an tum chu sorkarin Aizawlah inkhuahkhirhna khauh zawka a kalpui avangin an ṭhulh. CKṬP chuan, 'Pathian Hnaih Hapta' Live Crusade chu hun remchang danga neih a nih dawn thu an tarlang.

Synod Hospital chuan nimin khan thuchhuah siamin, damdawi-ina awm damlo zingah Covid-19 vei hmuh chhuah thar a nih avang leh, inchhui zui a ngaih avangin Synod Hospital out patient department (OPD) leh emergency service-te khâr rih a nih dawn thu an puang. Synod Hospital chuan an dinhmun hriatthiampui turin mipui an ngen a ni.

Covid-19 vei State Referral Hospital (ZMC)-a enkawl mek zinga mi pali chu ICU-ah enkawl niin, an paliin ventilator hmanga enkawl an ni. SRH-ZMC Bulletin tarlan danin, SRH-ah hian hripui vei mi 49 enkawl mek niin, chu'ng zinga 13 chu nimina dah luh an ni a; ICU-a awm lo zawng chu Isolation ward-ah awmin, ngaihtuahawm an awm lo.

Serchhip District Child Welfare Committee (DCWC) chuan nimin khan Serchhipa Covid-19 vei naupangte hnenah ṭanpuina pawisa an hlân. Serchhip DCWC hian tun hnaia an district-a Covid-19 vei hmuh chhuah mi pali hnenah Rs. 1,500 ṭheuh an pe a, naupang pakhat, a nuin hripui a vei avanga CCC-a awm mek tan Rs. 500 an pe bawk.