KHAWTHLIR

Dan bawhchhia mi 8,893 man

Transport minister Vanlalhlana chuan BJP member Dr K Beichhua zawhna chhangin, sorkar kum kal mekah lirthei dan bawhchhia mi 8,893 man an nih thu nimin khan House a hrilh a, "An dan bawhchhiat azirin pawisa chawitir ṭhin an ni. An pawisa chawi tling khawm zat chu cheng vbc. 2.70 a ni," a ti.

CJ tan TV pe

Mizoram Legislative Assembly Subject Committee-IV chuan nimin khan Central Jail (C-I Ward) hnenah television (TV) an pe. TV inhlanna hi Assembly House Committee Room-ah buatsaih a ni a, Subject Committee-IV chairman H Ginzalala'n Home joint secretary R Lalremsanga hnenah a hlan a ni.

Pa khawi zirhona

ICAR – National Bureau of Plant Genetic Resource, New Delhi, Mizoram University-a Department of Horticulture, Aromatic and Medicinal Plants (HAMP) leh Krishi Vigyan Kendra, Selesih te chuan March 17, Thawhṭanni khan MZU-ah pa (mushroom) khawi leh enkawl zirhona an buatsaih ṭan. Zirhona hi ni ruk awh tur niin, a hawnnaah hian MZU registrar Prof. Lalnundanga khuallian a ni a; mithiamte'n pa khawi leh enkawl dan an zirtir dawn a ni.

AR-in heroin man

Assam Rifles sipaite chuan March 17, Thawhṭanni khan Zokhawtharah Lallawmpuia (38), Zokhawthar hnen aṭangin heroin (no. 4) gram 23 an man a; Zokhawthar Police Station-ah an hlan nghal.

RTI Act inzirtir

Mizoram Information Commission chuan nimin khan Aizawl Municipal Corporation huam chhunga local council member-te tan ATI Auditorium-ah Right to Information (RTI) Act chungchang zirhona an buatsaih a, chief information commissioner John Neihlaia'n a hmanpui. Mizoram sorkarin kum 2023 khan LC-te chu public authority-a a puan avangin LC chairman-te chu RTI Act hnuaiah state public information officer an ni.

NER scheme zirho

Commerce & Industries department chuan nimin khan IPR Lianchhiari Rûnah 'State level workshop on North-East Region schemes' an buatsaih a, Commerce & Industries secretary Dr Lalzirmawia Chhangte leh director Maria CT Zuali ten an hmanpui. Dr Lalzirmawia chuan, scheme hlawhtlin nan ruahmanna mumal neih a pawimawh thu sawiin, department hmalaknate ngaichâng thiama sorkar thawhpui zel turin kal khawmte a chah.

Ngaihhnathiamna pe

Aizawl district magistrate Lalhriatpuia chuan hriattirna chhuahin, Sericulture department project zinga Eri Project kalpuina Sesawng ram, Nghathup lui kama SERIFED hnuaia primary society member chhungkaw 15, pangang huan siam turte tan lo vah chawp a ngaih avangin lo hâl hun chungchangah ngaihhnathiam an nih thu a tarlang. Magistrate tarlan danin, SERIFED member mi 15-te hian lo an vah chawp a ngai dawn a, kumin April thla tir lamah lo an hâl chauh dawn a ni.

Florists' Fair

Horticulture department leh Lunglei Florist Association (LFA) chuan nimin khan Saikuti Hall, Lungleiah pangpar chi hrang hrang pho chhuah rûnpui, Florist Fair an buatsaih a, district bawrhsap Navneet Mann-i'n a hawng a, LFA inkaihhruaina dan bu a tlangzarh nghal. Fair-ah hian pangpar zawrhna stall 19 leh balhla aṭanga thil siam hrang hrang zawrhna One District One Product (ODOP) stall siam a ni a; March 22, 2025 thleng a awh ang.