Rél kawng hawnnaa tel turin MP Vanlalvena'n MP-te a sáwm

Parliament budget session neih mekah Rajya Sabha MP K Vanlalvena chuan March 17, Thawhṭanni khan Railways hnathawh sawihonaah thu a sawi a; Bairabi-Sairang rêl kawng siam chu July 2025-ah zawh tum a nih thu sawiin, a hawnnaah tel ṭheuh turin MP-te a sáwm.

K Vanlalvena chuan, Bairabi-Sairang rêl kawng siam mek chu km. 51.38-a thui a nih thu sawiin, "Rêl chawlhhmun pali - Hortoki, Kawnpui, Mualkhang leh Sairang Sihhmuiah te a awm a, leiverh (underground tunnel) 32, lei tan tlang (cut and covered tunnel) 15, lei lian 55, lei tênau 89, kawngpui chunga lei dawh panga leh kawngpui hnuaia lei dawh pali a awm," a ti a, hna 95% zawh a nih tawh thu a sawi.

Rél kawng siam hna thawhna tura Railways Ministry-in sum a dah vbc 8,215 aṭangin vbc 7,714 hman a nih tawh thu sawiin K Vanlalvena chuan, "Sairang rêl kawng hawnna programme hi neih a nih hunah Aizawla lo kal vek turin MP zawng zawng ka sawm che u a ni," a ti a; harsatna hrang hrang kara tluang taka hna zawh a nih theih tawh dawn avangin Railways chungah a lawm thu a sawi bawk.