Ruihhlo, HIV/AIDS, sex chungchang inzirtirna zirlaite pualin buatsaih a ni
School Education department chuan nimin khan Lammualah ruihhlo hman sual, mipat hmeichhiatna hman khawloh leh HIV/AIDS chungchang inzirtirna an buatsaih a, Education minister Dr Vanlalthlana'n a hmanpui.
He hunah hian School Education department, SCERT leh Samagra Shiksha officer te, zirtirtu leh zirlaite an tel a; Asian Arm Wrestling Cup 2024 champion Denic Lalruattluanga kaihhruaiin taksa uluk leh thianghlim taka vawng tur te, ruihhlo ti lo turtea intiamna thu sawi rual a ni. 41st Mizoram Secondary School Games 2024 champion Aizawl district leh 21st Higher Secondary Games 2024 runner-up Mizo HSS ten exhibition football match an khel bawk.
Minister Dr Vanlalthlana chuan, Mizoram chu India ramah mihring tam lam aṭanga chhûtin HIV/AIDS hluarna ber a nihna chu tidanglam theitu an nih thu a sawi a; Mizoram dinhmun tidanglamtu ni tur leh ruihhlo leh mipat hmeichhiat hman khawlohna laka inthiar fihlim turin zirlai kal khawmte a chah.
Zirlaite chu huaisen taka nung tura chahin Dr Vanlalthlana chuan, "Hlau chung chung pawha ruihhlo tih loh ngam te, ngaihzawngte'n min thlêm pawha mipat hmeichhiatna hman loh ngamte a ṭul. Mi huaisen chu hriat hlawh an ni dawn a, pian ve manah mi zahawm nih hi a hlu," a ti a, zahawm leh huaisen taka nung turin a fuih.
MSACS project director Dr Jane Rinsangi Ralte chuan, HIV chu hripui, khawvel pum tibuaitu a nih thu sawiin, "Natna dang angin thawk chak vut vut lo mah se kan hlauh a ngai. Ram pum huap chawhrual aiin Mizoram hi a let 10-in a sang a, thla tin case 200-a pung zel ang kan ni," a ti.
Dr Jane Rinsangi Ralte chuan, Mizorama HIV vei zinga 67% chu mipat hmeichhiatna aṭanga kai an nih thu te, 30% chu hriau thianghlim lo hman aṭanga kai an nih thute sawiin, "Mipui náwlpuiah HIV a darh mek a ni," a ti a; zûk leh hmuam, ruihhlo, zu leh mipat hmeichhiatna laka inthiar fihlim tur leh nunphung hrisel nei turin zirlaite a chah.
Awareness campaign hi School Education director Angela Zothanpuii'n a kaihruai a ni.