Speaker-in Point of Order a sawifiah; 'PoO kan hmang dik lo' - Chief Minister

Nimina Assembly session-ah chief minister Lalduhoma chuan member-te'n mi thusawi laia thu an sawi duha an hman ṭhin 'Point of Order' chu member-te'n an hman ṭhin dan a dik loh thu a sawi a; speaker Lalbiakzama'n Point of Order chungchang a sawifiah.

Chief Minister chuan thu a sawi laia MNF member Robert Romawia'n Point of Order tia thu a sawi ve hnuah, "Kan thusawi an sawifiah nghal zel a, kalphung chu a ni lo. Min zawhna kan chháng a, an ngaithla ve mai tur. Kan member-te hian Point of Order chungchangah House Proceeding hi chhiar rawh se, eng nge a nih hre turin," a ti.

Point of Order an hmanna ṭhinah Point of Order tling a hmu lo tih sawiin Lalduhoma chuan, "Kan hmang dik lo. A hmanna a dik a nih chuan Chief Minister pawh a ngawi tur a ni, a ngaithla tur," a ti a; mahni sûlhnu pawr sawi mâm tumna atan Point of Order tling lo dinpui ṭhin a nih thu a sawi.

Assembly Speaker chuan an danin Point of Order hman theihna a tarlante chu - rules kalhin thu a sawi em, Constitution kalhin thil a ti em, tih a nih thu a sawi a, "A hman theih lohnate chu information dilna atan leh mahni position sawifiahna atan a ni," a ti.

Member-te'n statement an siam duh a nih chuan ziakin Assembly Secretary hnenah an dil tur a nih thu sawiin Speaker chuan, "Statement an siam duh chhan fiah takin an ziak tur a ni," a ti a; Speaker-in rem a tih chuan statement an siam theih thu a sawi.

Assembly Speaker chuan, miin thu an sawi laia auh buai leh tihbuai chu chìn tawh loh a duh thu sawiin, "Member-te in zalen ṭheuh ka duh. Kan duh zawngte sawi laia inkhap hrehawm ti mi ka ni a, 'Speaker a nêp mah mah' tih hi a ri ring khawp a nia, member-te zalenna ka pek duh che u avangin," a ti a; member-te chu inkhap emaw, inṭhuttir emaw ngaia awm lo turin a chah a ni.