CM Relief Fund sem dan tur tidanglam
Covid-19 dona atana Chief Minister’s Relief Fund-a sum chhun luhte hman dan tur ngaih tuahtu Committee on Utilization of CM Relief Fund for Covid-19 chu nimin khan chairman Lalnunmawia Chuaungo, chief secretary hoin CS conference hall-ah an ṭhu a; CM Relief Fund-a sum lutte village/local task force-a sem zat tur chu khua/veng mipui tam dan azira kalpui an rél.
Committee meeting hmasaah CM Relief Fund sumte chu Mizoram puma khua/veng 893-a task forcete hnena inzat vekin (Rs. 10,000) sem an lo rél tawh a; chu chu nimina meeting-ah ennawnin, mihring tam dan azir leh awmna hmun azirin a inzat loa sem an rel leh a ni. Mihring cheng zat azir te, duty-te mawhphurhna hautak zual biknate leh ramri depa khaw awmte thliarin category A, B, C leh special category-ah an ṭhen.
CM Relief Fund aṭanga task force-te hnena sum sem tur belhkhawm chu Rs. 2,04,85,000 a ni. Meeting hmasa rel tawh angin, home leh centre hrang hrang hnenah cheng nuai 23.65 leh mirethei chenna (Basic Services to Urban Poor complex)-a chengte tan Rs. 6,00,000 dah a ni bawk. Sum sem chhuah tur chu a vaiin Rs. 2,34,50,000 a ni.