Bána Kaih progress partner-te tan Saitualah training buatsaih

Mizoram sorkar flagship programme Bána Kaih (Handholding) Scheme pilot phase hnuaia Saitual district-a thawhpui tura thlan (progress partner) mi 36-te tan nimin khan DC conference hall-ah orientation training buatsaih a ni a, district bawrhsap Dr Lalngura Tlau-in hmanpui.

Saitual district-a Bána Kaih scheme hnuaia progress partner mi 36-te hi department hrang hrang hnuaia trade thlangtute an ni a; Horticulture department hnuaiah mi 16, AH&Vety department hnuaiah mi pasarih, Agriculture department hnuaiah mi paruk, Tourism department hnuaiah mi pahnih, LRSWC department hnuaiah mi pahnih, Sericulture department leh Science & Technology hnuaiah mi pakhat ve ve an ni.

Training-ah hian kutkawih eizawnna kalphung, Bána Kaih scheme, bank loan, Mizoram Startup Mission, accounting, bookkeeping, day book leh pawimawh dangte zirtir an ni a; training zawhah line department ṭheuhah technical training buatsaih leh a ni ang.

Dr Lalngura Tlau chuan, Bána Kaih hlawhtlinna chu progress partner-teah thui tak a innghah thu a sawi a, "Bana Kaih scheme tipuitling turin sorkarin theihtawp a chhuah zel a ni," a ti a; progress partner turte chu rinawm taka thawk a, theihtawp chhuah turin a chah.