Minister-in Nature Tour nei turte a vailiam

Environment, Forest & Climate Change (EFCC) minister Lalthansanga chuan nimin khan Vanapa Hall kawtah Nature Tour nei tura Nature Learning Centre (NLC) Mizoramin a tirh college zirlaite a vailiam.

Nature Tour-ah hian Pachhunga University College, Hrangbana College, Zirtiri Residential Science College, Khawzawl College leh Saitual College aṭangin zirlai 30 an tel. Kaziranga National Park, Guwahati Zoo, Ramsar site-Deepor Beel, Vulture Breeding Centre leh Pygmy Hog Conservation Centre-te an tlawh dawn a, March 22, 2025-ah Mizoramah an lo let leh ang.

Minister Lalthansanga chuan, zirlaite chu Tour-in a tumte hre reng a, an thil hmuh leh zir chhuahte Mizoram tana hlâwkna a nih theih nana inzir turin a chah a, "Ramngaw leh nungcha humhalh kawnga mi dangte zirtirtu ni thei ngei turin theihtawp chhuah ang che u," a ti.

Tour buatsaihtu Nature Learning Centre-Mizoram hi kum thum project niin, Champhai Forest Division hnuaiah kalpui mek a ni a; National Action Plan on Climate Change hnuaia mission pariat zinga pakhat, National Mission on Himalayan Studies aṭangin sum hmuh a ni.