Damdawi-in endiktu turte tan training

Mizorama sorkar damdawi-in hrang hrang endiktu tur internal assessor leh external assessor-te tan nimin khan Directorate of Hospital & Medical Education auditorium-ah training buatsaih a ni a; National Health Mission (NHM) mission director Dr Lily Chhakchhuak-in hmanpui.

Training hi NHM Mizoram, Mizoram Health Systems Strengthening Project (MHSSP) leh Regional Resource Centre for the North Eastern States (RRC-NE) te buatsaih a ni a; NHM Quality Assurance nodal officer Dr R Lalchhuanawma'n kaihruaiin, training-a telte tan exam buatsaih nghal a ni.

Dr Lily Chhakchhuak chuan, kum 2014 aṭangin Mizotamah internal assessor mi 142 leh external assessor mi 26-te'n training an zo tawh tih a sawi a, "Sorkar laipuiin December 2026 hmaa damdawi-in zawng zawngte 100% National Quality Assurance Standard (NQAS) certified tura a tih chu hlen ngei tum a ngai," a ti a; endikna piah lamah, damdawi-in ṭha nei tura taima taka thawk a, mi dangte tiphûrtu nih tum turin assessor-te a chah.