Doctor transfer-ah norms thar hman rawt Health dept.-in MR Bill-ah khauh an duh

Health department hotute July 15, 2015-a CMO Conference Hall-a ṭhukhawm chuan, doctor transfer leh posting-ah Department Transfer Norms thar hman ni se, an ti. Medical reimbursement (MR) chungchangah khauh taka kal an duh.

Meeting-ah hian doctor transfer leh posting-a Department Transfer Norms thar a rang thei ang bera hman a nih theihna atan hmalak an rel. Vanglaini palai zawhna chhangin, Health department hotute chuan, a hma chuan doctor chauh lo, group-A officer chinah chuan Secretariat-in transfer leh posting an khawih ṭhin. Department Transfer Norms thar hman a nih chuan doctor transfer leh posting-ah Secretariat leh Health department an inráwn tawh dawn a ni.

Meeting-ah hian, Mizoram páwna damlo thawn (refer)-naa senso (MR bill) tam lutuk tihhniam dan tur an sawiho a; damlo kalpuitu (attendant) thleng pawhin bituk chinte khauh lehzuala kalpui an duh. An duh dan hi MR bill zir chiang tura sorkarin Committee a dinah thlen an tum.

State Referral Hospital, Falkawna khum 300 a awm theihna atana hmalakna hrang hrang tarlan a ni a, nodal officer atan Dr Jane R Ralte an ruat.

Health worker posting pawh sawi chhuakin, "Health worker post sem rual tâwk loh vanga mipuite'n harsatna an tawh ṭhin avangin rualkhai zawka posting siam ṭhat ni se," an ti.

Saiha district leh Lawngtlai district-a nausen thihna leh nu nau chunga thihna a tlem zawk theihna atana ṭan lak dan tur pawh sawiho a ni a; Infant Mortality Rate leh Maternal Mortality Rate sànna hmunte chu hmanraw ṭha zawk leh changtlung zawka thuam a, uar leh zuala inzirtirna kalpui ni se, an ti.

Meeting-a tarlan danin, zirchianna aṭanga a lan dan angin, nausen thihna leh raicheha thihna tam ber chu chaw ṭha (nutrition) dik tak hmuh loh vang te, zûk leh hmuam tih nasat vangte a ni theia, hengte hian nu leh nauteah thisen tlâkchhamna a thlen ṭhin a ni.