Rajiv Gandhi Stadium sak mek I League thleng theia buatsaih tum

Rajiv Gandhi Stadium, Mualpui chu India rama football inelna sang I League thleng thei tura buatsaih tum a ni a, nimin khan minister pathum, sorkar offficial-te leh Mizoram Football Association hruaitute'n an enfiah.

Sports Minister Zodintluanga rawtna angin kum 2016-ah Aizawl FC-in I League an khelh theihna turin Lammual leh Rajiv Gandhi Stadium-te chu a ṭul anga thuam ṭhat turin kalpui mek a ni a; nimin­ah Sports Minister bakah PWD minister leh MFA president ni bawk Lal Thanzara leh minister C Ngunlianchunga-te'n an tlawh.

Sports minister chuan Lammual chei ṭhat tura tih a ni tawh chungin RG Stadium chei mek chu I League khelhna tlaka siam ṭha a ni a, "Kan khelmual neih pahnihte hi kan hmang rim em em a, kan duh ang thlap a ni tawh lo deuh a; nimahsela kan theihna zawnah kan thuam ṭha zel dawn a ni," tiin a sawi.

MFA hruaitute leh Aizawl FC lam hotute'n I League khelh theihna tura stadium-a thil neih leh sak belh ngai hrang hrang an sawite chu PWD lamin an chhinchhiah a, a rang lama bawhzui nghal an tum. PWD hi engineer hi chief R Vanlaltluanga hoin architect leh engineer ṭhahnem tak an tel.

Mizoram State Sport Council hotute pawh he hunah hian telin anni lam hian Lammual thawm ṭhat dan tur an bawhzui thung ang a; All India Football Federation leh Asian Football Confederation-in stadium hmantlak a tehna tlin ngei tumin ṭan an la dawn a ni.

India rama football inelna sang ber I League hi January, 2016-ah Aizawl FC-in an khel dawn a, Mizoram aṭanga I League khel thei hmasa ber an ni ang.

I League khelhna tur hian khelmual ṭha bik mamawh a ni a, dressing room changtlung, media room, conference hall leh thil pawimawh dangte a awm ngei tur a ni. Heng tehna hrang hrang an zamte tlin tumin Mizoram sorkar chuan ṭan a la mek a; AIFF lamin a khât tawkin an rawn tlawh reng tawh dawn a ni.