MJA-in an member tharte lawm lut

Mizoram Journalist Association (MJA) general headquarters chuan, nimin khan Aizawl Press Club-ah General Body Meeting leh MJA member tharte lawmna hun an hmang.

MJA inkhawm hi MJA vice president Zonunsanga Khiangte-in a kaihruai a, general secretary Lalsangzuala Hmar-in report a pe. President Vanlalrema Vantawl-in MJA member tharte lawmna thu a sawi a, MJA hruaitu hlun C Lalzamlova'n fuihna thu a sawi.

July 9, 2015-a thi, prominent journalist Hmaoko Hlychho, Saiha sûnna hun hman a ni bawk.

MJA President chuan, MJA member-te chu an hnathawha rinawm tur leh an mawhphurhnate hlen tum tura fuihin, "Member tinte hian tih tur leh ṭangkaina kan nei vek a, rinawm tur leh thurûk vawng thei mi kan ni tur a ni," a ti a; an chhia leh ṭha hriatna hmang thiam tur leh mipui tana ṭangkai tur chauh tichhuak thiam turin a chah.

MJA member thar lawm luhna hi an vaiin mi 15 an ni a, chung mite chu Aizawla mi 10 leh district danga mi panga an ni.