Degree course-a Mizo topper-te chawimawi

Mizo Students' Union (MSU) general headquarters chuan, nimin khan Vanapa Hall-ah kumina Mizoram University hnuaia degree course examination-a department tina Mizo zirlai ti ṭha ber (topper)-te chawimawina hun an hmang.

MSU-in chawimawina an hlante hi mi 22 an ni a, lawmpuina thuchei leh Rs. 1,000 ṭheuh an hlan. Chawimawi­nate chu khuallian, Prof. R Lalthantluanga, Mizoram University vice chancellor-in a hlan a ni.

Prof. R Lalthantluanga chuan, chawimawi phûte chu chawimawi tur an nih thu sawiin, "Zirnaah hlawhtling tur chuan a bul aṭanga ṭan lak a ngai a, hmantlak tak taka zir chhuak tur chuan tih tak taka a tìr aṭanga beih a ngai. Bye-heart system leh exam-a chhuak tura kan beisei chauh zir hi a fuh lo a, kan zirlai hi a nihna tak man fuh thei tura zirna kan kalpui a ngai a ni," a ti.

MZU Vice Chancellor chuan, "Degree nei si, hman tlak loh leh râwn tlak loh Mizo zirlai kan inchhuah ṭeuh chuan hnam dang mithmuhah kan mualpho a hlauhawm," a ti a; hnathawk tur lakah MZU-in a thiam apiang lak a tum niin a sawi bawk.