BSNL telephone bill bá ṭhìnnaah MCU-in dik tâwk lo awmin an hria
Mizoram Consumers’ Union (MCU) chuan thuchhuah siamin, BSNL-in telephone bill bá an ṭhìnna Lok Adalat kaltlanga tihchuuah ṭhinah thil dik tâwk lo a awma an hriat thu an tarlang.
MCU chuan, BSNL-in Lok Adalat kaltlanga bill bá an ṭhìnte chu kum 10 leh a aia reite a ni tlangpui tih sawiin, bill zat leh bill siam hun lai tihchian nan consumer-te'n bill dinhmun kimchang dil chhuakin, zir chian hmasak ni se an duh thu an sawi a, "BSNL-in detalied bill an pe thei lo a nih chuan thil fel lo a awm niin a lang," an ti.
MCU tarlan danin, telephone disconnect tawh hnuah bill tam tak awm thei tur a ni lo a, consumer-te'n disconnect tura an hriattir tawh hnuah BSNL-in an disconnect lo a nih chuan BSNL tih dik loh a ni a, consumer-te'n an tuar tur a ni lo. Telecom Rules angin consumer-in telephone line disconnect tura ngenna an thlen tawh chuan rental charge a awm tawh tur a ni lo. Chutih laiin, BSNL-in mi ṭhenkhat hnenah kum khat aia tam rental charge an ṭhíng nia an hriat thu MCU chuan an sawi.
BSNL-ah security deposit atan consumer-in Rs. 2,160 te, Rs. 1,800 te, Rs. 1,440-te an pe a, PCO-ah chuan Rs. 5,000– 10,000 pek a ni. Consumer-in telephone a disconnect a nih chuan BSNL-in consumer hnenah security deposit chu an pe kîr tur a ni tih sawiin, MCU chuan, "Hengte hi BSNL-ah zawh hmasak tur a ni a, BSNL hian lo hrilh hi an bat a ni," an ti.