MNF-in pastor-te thlavâng hauh an tum 'Congress Thlifim' enkawltute an báng

MNF general headquarters-a office bearer-te an president Zoramthanga hoa nimina Mizo Hnam Runa ṭhukhawm chuan resolution pass in, sakhaw puithiamte thlavâng hauh nan leh him nan theihtawp a chhuah zel ni se, an ti. Hetih lai hian, Congress party chanchinbu, 'Congress Thlifim' enkawltute chuan nimin khan MPCC President hnenah bànna an thehlut.

Nimina MNF OB-te meeting-ah hian elected OB-te bakah, general secretary, secretary leh joint secretary-te an tel a, an vaiin mi 100 chuang an ni.

MNF chuan, Congress-in an party chanchinbu, 'Congress Thlifim' July 4, 2015-a chhuakah, "Mizoram MLPC Act hman hnuah, Congress sorkar thil tih a nih avang­in nasa taka sawisel a, do a, mipuite zirtir ṭhin pastor hming, bial hming, khawi khaw chhuak nge a nih ziak la. Eng hun leh hmunahte nge sorkar policy kalpui mek (MLPC Act) hi a sawi­sel ṭhin?" tia zawhna a siam chu an dem thu an tarlang.

Pastor-te zinga zu zawrh mek sawisel leh do a, mipuite zirtir ṭhin zawn chhuah tumah Congress party chu puhin, MNF chuan, "Rapthlak kan ti a. Kristian rama thil thleng ngai lo leh thleng atan pawha kan duh ngai loh a ni... Kan dem tak zet zet. Tun laia Mosolman rama ISIS-te chêt bawraw dan nen pawh a inzûl hlein kan hria," an ti.

MNF chuan, MPCC-te chu chief minister Lal Thanhawla’n van­tlang hriata zu zawrh chungchanga kohhran a sawi dan bawhzui leh kohhran leh pastor-te nuihzatbûra hmangah an puh bawk a; "Kohhran leh pastor-te an chhui chiang ta mai hi an mimal nun leh an rawngbawlna atana hlauhawm, hmun rálṭi taka an dintirnaah kan ngai," an ti. pastor-te'n eng pawh tâwk se, Congress sorkarin mawh a phur tura an ngaih thu an sawi bawk.

MPCC chanchinbu Congress Thlifim hi MPCC Media Cell tihchhuah a ni a, MPCC Media Cell-a chairman chu James Thanghmingmawia niin, secretary chu David M Thangliana a ni. James Thang­hmingmawia leh David M Thangliana te hian nimin khan Congress Thlifim pub­lisher an nihna aṭanga bànna, MPCC president Lal Than­hawla hnenah an thehlut.

Congress Thlifim publisher-te bànna lehkhaah chuan, "MPCC party organ, Congress Thlifim chhuak hnu­hnung ber, July 2015 issue phek 4-naah khan Questionnaire déngkháwng tak, “Tu nge Sorkar Policy Do?” tih thupuia hmangin thu kan rawn chhuah a. Kha kan thuchhuah kha party remtihpui leh hriatpui pawh ni lovin keimahni ṭhahnemngaihna vanga rawn chhuah kan ni a. Kha thil khan mipui leh kohhran mite rilru na taka hliamin, kan party pawh nasa takin kan timualpho a. Hetianga mipui tichiaia party tihmingchhetu kan nih avang hian MPCC party organ Congress Thlifim publisher nihna chelh chhunzawm zel hi dikin kan hre lo va. Party-in a ṭhatpui zawk dawna kan hriat avangin publisher kan nihna aṭanga bànna kan han thehlut e," tiin an ziak a ni.