Sikul bungraw inthleng rûnpui ṭan a ni

DAY-NULM leh Swacch Bharat Mission chuan sikul bungraw inthleng rûnpui, ‘Swap & Save Campaign' an buatsaih ṭan a, nimin zing khan UDPA minister K Sapdanga'n Sanitation Side Office, Aizawlah a hawng.

Swap & Save Campaign hi a tlem thei ang ber mamawh neih, bawlh­hlawh tihtlem leh hman nawn theih hman nawn intihhmuhna tura buatsaih a ni a; March 21, 2025 thleng awh tur a ni. A duh apiang tan zirlaibu leh uniform hlui hman duh tawh loh, la hman theih site thawh theih a ni a, thawh khawmte chu a mamawhte hnenah sem leh a ni ang.

UDPA Minister chuan, sikul bungraw inthleng rûnpui chuan rilru a tihhlim thu sawiin, "A lawmawmna chu social work chi khat, mite ṭanpuina, naupang rilru buatsaihna, moral reform leh mite thilpek pea ṭanpui duhna mi thinlunga neih theihna tur, luan chhuahna chi khat a ni a, petu leh dawngtu tan a ṭangkai hle dawn a ni," a ti.

Zirlaibu chu a bi kima lei dawn chuan cheng sang bî sên a ngaih thu sawiin K Sapdanga chuan, "A petu tan hlâwkna, a peka tan ṭangkai a ni," a ti a; sikul bungraw inthleng rûnpui chu ṭangkai takin a tam thei ang berin hmang se a duh thu a sawi.

Swap & Save Campaign hawnna inkhawm hi UDPA secretary Lalmalsawma'n a kaihruai a; UDPA Minister hian lehkhabu dawn khawm sa aṭangin sanitation worker thlan chhuahte hnenah an fate zirlaibu tur a hlan nghal.

UDPA director Jacob Lalawmpuia chuan, Swap & Save Campaign-in a tum ber chu - zirlaite'n an zirlaibu, uniform, pheikhawk, school bag, box, tiffin box, etc. an hman ṭangkai tawh loh tur an dah theih nan leh, mamawhtute'n a thlawna an neih theih nan a nih thu a sawi a, "He hmalakna hian chhungkaw tam tak phurrit a chhâwk zângkhai beisei a ni," a ti.