House zahawmna leh discipline chhawm nung turin Speaker-in member-te a chah

Nimina Assembly session-ah Assembly speaker Lalbiakzama chuan, Mizoram Assembly House chu tun hma aṭanga inthununna ṭha leh zahawm, invawngfel a nihna chhawm nung turin member-te a chah.

March 18, 2025 zana Assembly session-ah Zampui Phuldungsei khaw mite Mizoram ration card aṭanga paih a nih chungchangah inhnial buaina a awm a, hemi chungchangah hi Speaker chuan nimin khan sawi chhuakin, House zahawmna vawng turin member-te a chah a ni.

Assembly Speaker chuan, session-ah minister emaw, member emaw ten thu an sawi laiin tibuai lo tura ngenna a siam tawh thu a sawi a, "Zawhna chhan laiin hnial buai emaw auh buai ching lo tur pawhin kan inngen tawh a ni," a ti.

House member-te'n ngaimawh, sawi loh theih loh an neih pawhin tih dan a sawi tawh tih sawiin Lalbiakzama chuan, "Speaker chair-ah tu pawh ṭhu se, dil ila, ding chhuaka sawi nghal bawrh bawrh loin. Statement siam kan duh e, tiin a dil theih a ni," a ti a; March 18 zanah member pakhat chu minister thusawi laia dingin thusawi a tum nghal mai thu a sawi.

Speaker chuan, statement siamah emaw, chhanna siamah chuan a hnuah sawi zui a awm ngai lo tih sawiin, "Member-in a ngaih pawimawh avangin kalphung pêl dawn dawnin, minute hnih thusawina hun pek kan tiam. Member-te zalenna pek ka duh vang a ni. Mahse, minute hnihah a khung loh avang leh mipui play tumna lutuk anga a lan theih avangin member dangin 'A tawk e' an ti," a ti.

March 18, 2025 zan khan Food, Civil Supplies & Consumer Affairs (FCSCA) minister B Lalchhanzova'n a demand a khaikhawm laiin MNF member Robert Romawia Royte-in Phuldungsei khaw mite Mizoram ration card aṭanga paihah Mizoram sorkar a puh a; Minister chuan Tripura-ah nen ration card an neih kawp avangin technology-in automatic-a a paih thu a sawi thung. Member dangte pawh ding chhuakin, an inhnial buai zui a, Speaker-in ṭawng rinna (mike) a tihtawptir a ni.