Central-in kuhva chìn belh ṭul a ti lo, keini chuan kan thlâwp lo - Lalthansanga

Land Resources, Soil & Water Conservation (LRSWC) minister Lalthansanga chuan nimina Assembly session-ah sorkar laipuia Agriculture & Farmer Welfare, Horticulture Division chuan kuhva chîn belh zel an thláwp tawh lo tih sawiin, chu chu Mizoram sorkarin an thlàwp loh thu a sawi.

Zawhna hrang hrang chhangin LRSWC Minister chuan, Agriculture & Farmer Welfare, Horticulture Division-in kuhvaah India ram a intodelh tawh avangin chin zel ṭul an tih loh thu DoNER-ah an hriattir tih a sawi a, "DoNER pawhin an thu dawn hi Mizoram min rawn hrilh ve. Hetiang a nih avang hian kuhva chin belh tawh loh tur tiin thu a thang a ni," a ti.

Lalthansanga chuan, kuhva chìn belh tawh loh tih chu Mizoram chuan a thlàwp loh thu sawiin, "Thlàwp a nih loh avangin vawiin thlengin an la chìn belh zel. Kuhva chìn belhna tur project erawh siam tawh loh ni se tih a ni," a ti a; CM Special Package leh Handholding scheme ten kuhva chìn hi a huam thu leh diltu eng emaw zat an awm thu a sawi.

LRSWC Minister sawi danin, kuhva tihrona leh skop-na atan NABARD aṭangin cheng vbc. 27 chuang hret hmuh a ni tawh a, tender chhuah mek a ni.