KHAWTHLIR

Project 78 thehlut

Planning changtu chief minister Lalduhoma chuan BJP member Dr K Beichhua zawhna chhangin, sorkar kum kal mekah PMJVK kaltlangin project 78 thehluh a nih tawh thu nimin khan House a hrilh a, "Heng project-te hi Ministry of Minority Affairs-in an endik mek a, approval dawn a la ni lo," a ti.

La thlang lo

Planning & Programme Implementation changtu chief minister Lalduhoma chuan nimin khan Assembly session-ah MNF member Ramthanmawia zawhna chhangin, Bána Kaih scheme-a Chief Minister Special Package hnuaiah ṭanpuina Rs 1,00,000 dawng tur thlan a la nih loh thu a sawi.

Hockey sawiho

Sports minister Lalnghinglova Hmar hoin nimin chawhnu khan Assembly House-a Deputy Speaker room-ah Mizorama hockey tihhmasawn dan tur sawiho a ni. Ṭhutkhawmah hian deputy speaker Lalfamkima, MLA pahnih - T Lalhlimpuia leh Jeje Lalpekhlua bakah, Olympian Lalremsiami leh Hockey Mizoram hruaitute an tel a, hockey khelhna tur hmun tam zawk neih dan tur te, hmalak mekna leh hmasawn dan turte sawiho a ni.

Tui tihvawhna pe

AMC Ward-XVI bialtu corporator R Lalawmpuii, ZPM Zonu president ni bawk chuan a biala Bethlehem Vengthlang YMA diamond jubilee lawmpui nan Bethlehem Vengthlang YMA Office-a hman tur tui tihvawhna (water cooler) nimin khan a pe. Water cooler hlanna hi Bethlehem Vengthlang YMA office-ah buatsaih a ni.

MCAB Keifang Building hawng

Mizoram Coope­rative Apex Bank chairman Lalnunsanga chuan nimin khan MCAB Keifang Branch building thar a hawng. MCAB Keifang Branch hi Keifang VC House-ah July 21, 2020 khan bul ṭan a ni a, anmahni'n building thar an neih tâk avangin nimin khan an insuan lut a ni. In sak nan cheng nuai 235.42 sên a ni.