Treasury Bazara ṭhute'n insawn tum

Treasury Bazar Association chuan, Aizawl Municipal Corporation (AMC)-in AMC Multi Complex, Tuikual South-ah insawn lut tura an ngenna chu tihhlawhtin an tum thu an sawi a; chutih rualin, dan lo leh traffic tibuai theia thil zuarte lakah an intiam ang ngeia hma la turin AMC an beisei.

Nimin khan Aizawl Press Club-ah Treasury Bazar Association hruaitute'n thuthar thehdarhtute an kâwm a; AMC ngenna angin AMC Multipurpose Complex-ah insawn luh an tum thu sawiin, "Thuawih taka buaina leh harsatna siam loa chêt hi kan tum a ni. Kan luh thlak rualin dan loa inzuarte leh traffic tibuai theia inzuarte lakah pawh an intiam ang ngeiin hma an lak ngei kan beisei tlat a ni," an ti.

Nimin vek khan Aizawl mayor Lalrinenga Sailo hoin a pisaah AMC hotute leh Treasury Bazar Association hruaitute an inkâwm a; a rang thei ang bera AMC Multi Complex-a lut thla turin inremna an siam. Pawl hruaitute hian an mamawh leh ṭul nia an hriatte AMC hotute hnenah an thlen nghal bawk.