KHAWTHLIR

Neurosurgery unit hawn tum

Health & Family Welfare minister Lalrinpuii chuan MNF member Dr K Beichhua zawhna chhangin, Zoram Medical College & Hospital, Falkawna Surgery department hnuaiah Neurosurgery unit hawn tum mek a nih thu nimin khan Assembly House a hrilh.

Annual Sports Meet

Mizoram University-a Sports Department chuan tunlai hian University Annual Sports Meet vawi 23-na an buatsaih mek a, infiamna chi hrang hrang - football, volleyball, basketball, badminton, table tennis, athletics leh chess-ahte zirlaite an intihsiak. Meet hi March 17, 2025 khan ṭan niin, Mizorama college/institution 20 an tel a, vawiin hian Rajiv Gandhi Stadium-ah khâr a ni ang.

Mizoram UPC Pastor seminar

Mizoram UPC pastor-te chuan March 19-20, 2025 chhung khan Pastor Seminar an buatsaih a, pastor 96 an tel. Seminar hi general superintendent Rev. P Lalrinawma'n a kaihruai a, rawngbawlna kawnga hmasawnna tur pawimawhte zirho a ni. Mizoram UPC Crusade & Evangelism-a hman turin pastor kal khawmte hian thawhlawm Rs 9,55,000 an thawh nghal bawk.

Ramri enfiah

Border Security Force (BSF) director general Daljit Singh Chawdhary chuan March 18-19, 2025 chhung khan Mizoram khawthlang lama BSF border outpost-te a tlawh a; ramri vennaa dinhmun, harsatna leh hmalak dante a enfiah. BSF DG hian March 17 khan Raj Bhavan-ah Governor Gen. Vijay Kumar Singh a kâwm bawk.

Inziah luh ngai

Lunglei SP J Lalmuankima chuan thupek chhuahin, Lunglei district-a hotel/institution/homestay tan indianfrro.gov.in/frro/FormC/login.jsp kaltlangin foreigner registration form 'C'-ah registration tih vek tur a nih thu a puang. Registration tih dan thiam lo tan Lunglei SP Office-a Foreigner Cell-ah zawhfiah theih a nih thu a tarlang bawk.

Consumer Rights Day hmang

Siaha District Civil Supply pisa buatsaihin nimin khan Siahaa DRDO conference hall-ah World Consumer Rights Day hman a ni a, district bawrhsap VL Hruaizela Khiangte-in a hmanpui. Advocate Mary J Ngurnunmawii'n kumina Consumer Rights Day thupui a sawi a ni.