2025-26 AMC budget vbc 112.17

Aizawl Municipal Corporation (AMC) Board of Corporators (BoC) chu nimin aṭang khan an ṭhukhawm a; kum 2025-26 AMC budget estimate cheng vbc 112.17 pharh a ni a, budget aṭanga 79.83% chu hmasawnna hna thawhna atan ruahman a ni.

AMC BoC meeting hi mayor Lalrinenga Sailo a kaihhruai a; executive corporator (Cash & Accounts) Lalringliana'n kum 2025-26 budget estimate cheng vbc 112.17 a pharh. Budget estimate hi vawiinah sawiho a ni leh dawn a, pawm tum a ni ang.

Budget pharhtu Lalringliana chuan, budget hi tun AMC term tana budget an siam hnuhnung ber tur a nih thu a sawi a, "Lunglei Municipal Council (LMC) nen 15th Finance Commission grant insem a ṭul tâk avangin kum kal ta aiin budget estimate hi cheng vbc 3-in a kiam. Sorkar laipuiin min beisei angin kan thawh chhuah ve liau liau (own source of revenue) erawh pun lam a pan zel a, thil lawmawm tak a ni," a ti.

AMC BoC ṭhukhawm hian 15th Finance Commission rawtna bawh­zuina atan property tax zone a ennawn a; zone rate tidanglam loin, veng ṭhenkhatte awmna siam rem a ni.