Hnahthial district chhungah sorkarin sawhthing quintal 1,139.58 a lei tawh

Hnahthial district-ah Bána Kaih (Handholding) scheme kaltlangin sorkarin Rs 56,97,900 man kut hnathawktute sawhthing quintal 1,139.58 a lei tawh a; secondary collection centre-a sawhthing bûk sa khul nan cheng nuai 51 an la mamawh belh.

Hnahthial District Agricultural Marketing Committee chu nimin khan an chairman K Vanlalruati, bawrhsap kaihhruaiin an ṭhukhawm a; Hnahthial district-a SCC panga kaltlanga sawhthing lei chungchanga hmalakna leh hmachhawpte tarlan a ni a, SCC tin viltu tur coordinator pakhat ṭheuh ruat an rêl.

DAMC member secretary Julie Zodinpuii tarlan danin, Hnahthial district-a sawhthing chhêk khâwlna SCC panga - Darzo, Cherhlun, Chhipphir, Tarpho leh Hnahthialahte sorkar aṭanga sum an dawn milin ṭhuang hnihin sawhthing chhûn khawmte khulna tur sum pek chhuah a ni tawh.

Ṭhuang khatnaah SCC pangate aṭangin sawhthing qtl 664 lei nan Rs 33,20,000 pek chhuah tawh a ni a, ṭhuang hnihnaah qtl 475.58 lei nan Rs 23,77,900 pek a ni tawh bawk. Sawhthing leina atana pawisa pek tawh zat hi a vaiin Rs 56,97,900 a ni a; sorkar aṭangin SCC-a sawhthing leina atan cheng vbc 1.5 hmuh tawh a ni. SCC-a bûk tawh si pawisa la pek loh nena chhûtin tun dinhmunah sawhthing khul nan cheng nuai 51 la mamawh belh a ni.

Ṭhutkhawma tarlan danin, sawhthing hralh/lei leh hunah chuan support price kalphung pangngai anga kalpui tum a ni dawn a; SCC-in sawhthing tender an chhuah ang a, chumi chhángtu chhàn zat milin loneitute chu sawhthing chawhtir an ni ang a, sawhthing lei tura chhangtute'n an chhanna chu kg. khatah Rs 50 a tlin loh chuan, a tlin lohna sorkarin a tum ve dawn a ni.

Sawhthing hralh chhuah first phase (February 20 - March 20, 2025)-ah Hnahthial leh Cherhlun SCC-ah tender chhangtu an awm tawh a, an sawhthing duh zat demand pawh an pek tawh bakah, anni hian kg khat Rs 20-in an chhang.