Tomato chìn leh enkawl dan zirho

Krishi Vigyan Kendra (KVK), Khawzawl chuan nimin khan Chawngtlai community hall-ah Chawngtlai khuaa tomato chingtu mi 130 pualin Farmers-Scientist Interaction an buatsaih a, tomato chi (seed) kg 2 ṭheuh an pe nghal.

Inkawmhona hun hi KVK head & senior scientist Dr Malsawmkimi'n a kaihruai a; KVK subject matter specialist (plant protection) Dr Lal-ngaihawmi'n thlaia natna hrang hrang awm thei leh thlai tichhe thei rannungte laka thlai ven dan turte a sawifiah. Kut hnathawktute chuan tomato chìn leh enkawlnaa an harsatnate an zawt bawk.

KVK, Khawzawl leh Indian Institute of Hor-ticultural Reasearch North Eastern Himalayan Region (IIHR – NEH) thawk dunna kaltlangin kum 2024 khan Chawngtlaia tomato chingtu chhungkaw 80 hnenah tomato chi kg. 1.5 ṭheuh pek a ni a, tomato quintal 1,430 an thar. Tomato an thar aṭang hian Rs 57,00,000 an lei chhuak. Kumin 2025 hian chhungkaw tam zawkin tomato ching turin hma an la mek a ni.