Manipur Zo hnahthlak buainaah inremna thu sawi vat turin ngen

MZP Gen. Hqrs chuan thuchhuah siamin, tun hnaia Manipur-a Zo fate inkara buaina chhuak chu pawi an tih thu an tarlang a; Zo fate inkara buaina leh thisen inchhuahna chu thil ṭha lo a nih avangin inremna thu sawi vat turin an ngen.

MZP chuan, "Manipur Zo fate'n hmelma thuhmun an neih lai leh rorelna hrang (separate administration) nei tura hma an lak mek laiin, Hmar leh Zomi inkarah buaina nasa tak a chhuak hi pawi kan tiin, vanduaithlâk kan ti a, dawhkân pakhat kîla inremna thu sawi vat turin Zomi leh Hmar hruaitute kan ngen a ni," an ti.

Buainain thil ṭha mah a thlen lo tih sawiin "Chengho kan nih avangin Zo fate inkarah thu inbah sual palh theih a ni. Hetiang a awm pawhin hnam anga buaina kalpui leh tipunlun zawng ni loin, chinfel vat vat dan ngaihtuah turin Zo fa hnam hrang hrang hruaitute kan ngen a ni," an ti a; inphah hniama remna kawng zawh turin an ngen a ni.