Health Minister-in health clinic centre sak dan Assembly House-ah a sawifiah

Health & Family Welfare minister Lalrinpuii chuan nimin khan Assembly session-ah ZPM member T Lalhlimpuia zawhna chhangin Mizoram hmun hrang hranga health clinic centre sak dan a sawifiah.

HFW Minister chuan, health clinic centre-te chu kum 2023-a sak ṭan a nih thu a sawi a, "Sorkarna kan lakin sak tawh record 68 a awm a, Mamit bialtu MLA-in pahnih a sawi nen 70 sak zawk a lo ni tawh a, a bak zawng kan sak chhunzawm a ni. Kan sorkar hnua plan leh estimate-te siam a ni lo," a ti.

Health clinic centre sakna estimate chu Rs 2,90,000 a nih thu sawiin Lalrinpuii chuan, "Finance department lama cut ngaite cut a nih hnuah Rs 2,60,000 chauh a ni a, a beitham hle," a ti a; health clinic centre tam tham tak sak ni mah se, a tak taka hman (function) theih tur nia a hriat loh thu a sawi.

HFW Minister chuan, Health department mawhphurhna a lak tirhin Finance department officer-te lêngah a sàwm thu sawiin, "Sak ṭeuh ringawt a ṭangkai dawn chuàn loh avangin a component tihdanglam hrâm dan a awm em ka ti a ni," a ti.

Health Minister chuan, Finance department lamin rei tak an khalh hnuah utilisation certificate (UC) pek vek tawh a nih thu an hrilh tih sawiin, "UC pek vek tawh a ni a, chuvangin in sak ve ngei a ngai. SASCI sum a nih angin SASCI lam aṭanga endik a nih chuan in che buai ang min ti a ni," a ti a; health clinic centre chu an sorkar hnuah pawh sak chhunzawm ve a nih thu a sawi.