Mizoramin Phuldungseia mite tan thla tin buhfai a pe - ZPM Ṭhalai

ZPM Ṭhalai chuan thuchhuah siamin, Mizoram sorkarin Zampui Phuldungseia Mizo 85-te tan manual-in October 2024 aṭangin thla tin buhfai quintal 7.35 a pe chhuak mek thu an tarlang.

ZPM ṭhalaite chuan, March 18, 2025-a Supply minister B Lalchhanzova'n Assembly House-a a sawi chhuah angin, Tripura leh Mizoram state-a ration card nei kawpte Mizoram aṭanga paihte tan Minister-in theihtawp a chhuah thu an sawi a, "Manual hmangin ration buhfai hi thla tin pek mek a ni. Tripura-a ration card nei tawh loa Mizorama ration card an neih zui ngei thei nan Mizoram solrkarin theihtawp chhuahin hma a la zui mek," an ti.

ZPM Ṭhalai chuan, Tripura leh Mizoram ramria cheng Mizote tana Mizoram sorkar hmalakna hre chiang loah MLA Robert Romawia Royte an puh a, "Ration buhfai pe lo anga thu dik zîktluak loa Assembly House-ah a sawi chhuak hi pawi kan ti. MLA bawh chak tak nih duh vanga thu dik tâwk lo sawi tawh lo turin kan ngen a ni," an ti. Mizoram sorkar hmalakna thláwp turin Tripura leh Mizoram ramria chengte an ngen bawk.