Lawngtlaiah oil palm extraction centre din thuai a ni dawn - Chief Secretary

Chief secretary Khilli Ram Meena chuan nimin khan Lawngtlai DC conference hall-ah Lawngtlaia sorkar official-te a kâwm a; Patanjali Foods Limited-in Lawngtlaiah oil palm extraction centre an din thuai dawn thu a sawi.

Khilli Ram Meena chuan, oil palm thar tam tura ṭan lak a ṭul thu sawiin, "Patanjali Foods-te'n Lawngtlaiah oil palm extraction centre an din thuai dawn a, oil palm thar lama ṭan la turin inkalpawhna kawng ṭha a ṭul dawn," a ti a, sorkar hnathawkte chu a theih ang anga hma la turin a chah.

Ṭhalaite tan kut themthiamna lam inzirtirna buatsaih a ṭul thu sawiin Chief Secretary chuan, "Entrepreneur tam zawk neih a ṭul bakah, an thil siam chhuah ang angte hralhna tur market ngaihtuahsak kawngah chhuah a ṭul," a ti.

Chief Secretary chuan Police department-te chu India rama criminal law chi thumte hre chiang hle tur leh a ṭul anga training ṭha nei ṭhin turin a chah a, "Free Movement Regime (FMR) chungchangah dan ang taka hmalak a nih theih nan BSF, Assam Rifles leh district administration-te thawhho thiam a pawimawh," a ti. Lawngtlai district-a inkalpawhna kawng ṭha tâwk lo leh literacy rate hniam chu veiawm a tih thu a sawi bawk.

Inkawmhonaah hian Lawngtlai bawrhsap Cheemala Siva Gopal Reddy-a'n an district dinhmun tlangpui, hmalakna leh hmachhawpte a tarlang a; Lawngtlai SP Lokeshwaran R pawhin Police department hnathawh leh hmalakna tlangpui, dan leh thupek kenkawh leh harsatna an neihte a tarlang bawk a ni.