2025-26 Mizoram budget pawm a ni: 'MLA-te'n ṭhahnemngai takin ro an rel a, a lawmawm ka ti' - Assembly Speaker

Mizoram Legislative Assem­bly pakuana session vawi lina, budget session chu March 20, Ningani zan 9:38 khan a ṭiak a, kum 2025-26 chhunga Mizoram sorkar sum hman tura ruahman (budget estimate) cheng vbc 15,198.76 pawm a ni. Speaker Lalbiakzama chuan, MLA-te'n ṭhahnemngai tak leh dawhthei taka ro an rêl chu lawmawm a tih thu a sawi.

Assembly budget session hi February 19, 2025-ah ṭan niin, ni 30 chhung awh a ni a, sorkar chawlh leh thil dang pawimawh vanga ṭhutkhawm theih loh ni eng emaw zat a awm avangin ni 14 chhung ṭhutkhawm a ni.

Session tawp ni, March 20, Ningani zan dar 9:18 khan Mizoram budget estimate 2025-26 cheng vbc 15,198.76 chu member-te'n lungrual takin an pawm. Supple­mentary Demand 2024-25 cheng vbc. 3,512.33 erawh chu March 5, 2025 khan pass a lo ni tawh.

Mizoram budget thar pawm tâk zinga cheng vbc 2,616.33 chu Mizoramin a thawh chhuah ve tur a ni. Budget pum­pui zing­a vbc 13,835.43 chu House-a pawm ngai (voted) a ni a, cheng vbc 1,363.33 erawh chu House pawm kher ngai loa hman theih (charged) a ni thung.

Session tawp zanah Assembly speaker Lalbiakzama chuan, session tluang taka kaihruaitu Pathian hnenah lawm thu a sawi a, "MLA-te'n taima tak leh dawhthei takin ro an rêl a, lawmawm ka ti hle. Ka veilam leh dinglama mite inbuatsaihna a ṭha tih a hriat hle. Ngaihdan inang lo deuhah pawh indawh tawnna a lo lang leh thei ṭhin hi a lawmawm," a ti.

Lalbiakzama chuan, ṭha­hnem­ngaih luat vanga han rîk deuh cháng awm mah se, inhriatthiamna nen an inngaithla zui leh mai thei ṭhin tih sawiin, "Hei hi a parlia­mentarian ṭha zia a, a Mizo em em a ni," a ti a; thu inchuhna lamah ṭawng duhthawh deuh a awm a nih pawhin, rorelna in chhung bâk pelhtir a ni ngai lo tih hre reng turin member-te a chah.

Assembly Speaker chuan, session-ah inchaltauh bap bap a awmte chu Mizoram leh mipui hmangaihna vang a ni tih hre turin mipuite a ngen bawk.