Aizawlah Walk for Health Walkathon

Nimin zing khan Aizawlah hriselna atana kea kal rûnpui - Walk for Health Walkathon buatsaih a ni a, mi ṭhahnem tak kein an kal. Walkathon-a kalte chu Lammualah an intâwk khawm a, Walk for Health Walkathon khârna inkhawm hman a ni.

Mizoram Health Systems Strengthening Project (MHSSP) huaihawt Aizawla Walkathon-ah hian hmun pasarih - Sikulpuikawn, Khatla kâwn, Dinthara NHM pisa kawt, Chhinga Veng, Chanmari kâwn, Chaltlang Dawrkawn leh Ramhlun South aṭangin zirlai, ṭhalai, pawl hrang hrang aiawhte leh Health department-a thawkte an kal ṭan a; Health minister Lalrinpuii, MLA pahnih Dr K Beichhua leh Lalmuanpuia Punte te pawh an tel.

Walk for Health Walkathon khârna inkhawm Lammuala buatsaihah Health Minister chuan, Mizoram leh khawvelah natna inkai chhâwn theih loh natna benvawn a pun tial tial thu a sawi a, "Heng natna laka fihlim a, a vei tawhte pawh an inenkawlna atana pawimawh chu taksa zawisawi a ni a, kea kal hi taksa sawizawina harsa lo leh hlawk si a ni a, rei lo tê pawh ni se ni tin kea kal hian nunna pawt sei thei a ni," a ti.

Kharna inkhawmah hian Hospital & Medical Education director Dr Eric Zomawia leh World Bank lam aiawh Navneet Kaur Manchanda te pawhin thu an sawi a; kea kal tam tura intiamna thu sawi rual a ni. District hrang hranga Walk for Health walkathon neih tawhnaa district community mobiliser ṭha thlante hnenah lawmman hlan a ni bawk.

Walk for Health walkathon hi MHSSP-in World Bank bultuma an buatsaih a ni a, natna inkai chhâwn theih loh chi hrang hrang dona atana tih a ni. February 15, 2025 khan district hrang hrangah ṭan a ni a, Mizorama khaw eng emaw zatah buatsaih niin, 510 aṭangin mi 70,000 vel an tel a ni.