Khârkhipna kal mek tâwp hunah CYMA-in pawhsei an rawt dawn

Central YMA chuan, India ram puma khârkhipna kalpui mek chu April 14, 2020-a a tawp hunah pawhsei leh an duh a, an duh dan chu Mizoram sorkarah an thlen dawn.

CYMA Executive Committee, April 8, Nilaini zana CYMA Committee Room-a ṭhukhawm chuan, "Hripui léng vanga khârkhipna (lockdown) ni 21 chhung atana ruahman chu April 14, 2020-ah a tàwp dawn tâk avangin, kan state dinhmun thlira he kharkhipna hi la chhunzawm zel ṭha kan ti," an ti a, an duh dan chu sorkara thlen an rél a ni.

Central YMA hian thuchah tichhuakin, lockdown kalpui a nih avangin dawr lian awm ve lohna veng tam takin ni tin ei leh in 

mamawh lam kawngah harsatna an tawh mek thu an tarlang a, "Dawr lian awmna venga YMA branch-te chu branch dangte mamawh lam khawmna kawngah harsatna siamtu ni lo a, ṭanpuitu ni ṭheuh turin kan inngen a ni," an ti.

CYMA THUREL DANG • Hripui léng vanga ei leh bàra veng/khuate'n harsatna kan tawh mekte sukianga khairual zawka hmalak ni se (sorkara thlen tur). • Mizoram ramri international/inter-state leh hmun danga tlawmngaia mahni inthàpa venhim hna thawktute tlawh chhuah. • State páwna Mizo tangkhangte dinhmun zir chian a, a ṭul anga ṭanpui dan ngaihtuah.