KHAWTHLIR

Vawiin Zirtawpni hi Isua Krista mihringte chhandam tura kraws-a khenbehna champha, Good Friday a ni a; kum dang ah urhsûn taka hman ṭhin ni mah se, kuminah chuan Covid-19 do nan khârkhipna kalpui mek a nih avang leh natna laka invên nan kohhrante'n inkhawm an tihtawp rih avangin hman a ni dawn lo. Hetih lai hian, khaw ṭhenkhatah leh kohhran ṭhenkhat chuan vantlang aurinna leh local TV channel-te hmangin inkhawm an nei dawn nia thu dawn a ni.

UPC (NEI) chuan nimin tlai dar 5:00-5.30 inkar khan Covid-19 léng chungchanga Pathian ṭanpuina dilin chaw ngheia ṭawngṭai rûnpui an huaihawt a, tualchhung kohhran tinin an remchan angin an hmang. UPC (NEI) general superintendent Rev. Lalmalsawma Sailo chuan, chaw ngheia ṭawng ṭai an buatsaih chu Pathianin mal a sàwm ngei an beisei thu sawiin, "Ṭhahnemngai taka ṭawng ṭaina hian rah ṭha a chhuah ngei ka beisei tlat a ni," a ti.

AVBD leh NSS ruahman angin nimin khan Aizawl Civil Hospital-ah NSS unit pali - Zirtiri Residential Science College, Johnson College, Aizawl West College leh Mizo HSS-te'n thisen unit 60 an pe a, petute mipa 58 leh hmeichhia pahnih an ni a; CZ HSS NSS unit pawhin Kolasib District Hospital-ah unit 7 an pe. Synod Hospital ngenna angin Durtlang Branch YMA-in nimin khan thisen unit 13 an pe a, Zote-a Sangpuii Inlengte'n Champhai District Hospital-ah unit 10 an pe bawk. 

ZPM MLA-te zinga mi palite chuan April 8, Ningani khan an bial chhunga khua/veng hrang hrangah thil chi hrang hrang an sem. Aizawl North-I bialtu Vanlalhlana, Aizawl North-II bialtu Dr Vanlalthlana, Aizawl SouthII bialtu Lalchhuanthanga leh Tuirial bialtu Andrew H Thangliana te chuan an bial chhung ṭheuha village/local task force-te tlawh kualin, bial mipuite tan pawisa, ei leh in tur, chawhmeh chi hrang hrang, thlai chîte leh Covid-19 laka invenna hmanruate an sem a ni.

Zoram Peoples' Movement (ZPM) chuan nimin khan thuchhuah siamin, Mizoram MP hlui Hiphei (82), April 8, Nilaini zinga a thi ta chu an ui thu an tarlang a, "Mizoram politician ropui leh hlawhtling berte zinga mi kan chán ta mai hi ZPM chuan pawi a ti a, a ui tak meuh a ni," an ti. A kalsan tâk a chhungkuate Pathianin awmpui se an duh thu an sawi bawk.