Loneitute mamawh Central-ah thlen

Union Agriculture & Farmers' Welfare minister Narendra Singh Tomar leh minister of state pahnih Parshottambhai Rupala leh Kailash Choudharyte hoin nimin khan state hrang hrang Agriculture leh Supply minister-te'n video conferencing hmangin meeting an nei a; Mizoram Agriculture minister C Lalrinsanga'n Mizorama loneitute dinhmun leh mamawhte a thlen.

C Lalrinsanga chuan, kharkhipna vanga loneitute harsatna tawh leh mamawh an neihte thlenna tur Farmers' Helpline kalpui mek a nih thu leh loneitute'n an ṭangkaipui thu a sawi a; páwn lam aṭanga puihna project - IFAD hnuaia FOCUS leh FAO hnuaia GEF-ahte hna ṭan theih a ni rih lo tih sawiin, "Sawhthing, aieng leh fu huan/lo neitute'n an seng mek chu hlawhfa rawih tur an awm loh vangte leh state danga thawn chhuah kawngah harsatna a awm avangin an seng rih lo," a ti.

Agriculture Minister chuan, oil palm chíngtute'n a rah an hralhna hmun ber Godrej Agrovet mill chu khâr a nih avangin hralhna tur an neih loh thu leh chuvang chuan oil palm chíngtute'n cheng nuai 25-30 vel an hloh tawha chhût a nih thu a sawi a; oil palm thartute hnenah minimum support price pek dan tur September 2019-a Mizoramin a thlen tawh chu pawmpui turin Union Minister a ngen a ni. Minister C Lalrinsanga hi Agriculture leh Horticulture department hotu te'n an ṭawi awm.