Task group panga din belh

Covid-19 darh zel tur ven nan Mizoram sorkar chuan April 8, Nilaini khan task group thar pahnih a din a, nimin khan group thar pathum a din belh.

March 30, 2020-a task group panga din tawh nen task group 10 din a ni tawh. Nilainia task group dinte chu Task Group on Media & Publicity leh Task Group on Documentation a ni. Media & Publicity-ah chairman chu IPR secretary Sangdingliana niin, IPR director Lallianpuii chu member secretary a ni a; member dang pathum an awm. Anni hian Covid-19 kaihh nawiha sorkar thupek leh thuchhuah hrang hrang te, thuziak leh thuthar chi hrang hrang mipui hriat tura ṭangkai an la khawmin, Covid-19 daily bulletin an siam ang.

Documentation-a chairman chu Planning secretary Dr Vanlalramsanga a ni a, membersecretary chu Economic & Statistic deputy director B Lalrinhlua a ni. Member dang pahnih an awm. Anni hian Covid-19 leh khârkhip chungchanga sorkar hmalaknate leh a kaihhnawih thil pawimawhte vawng ṭhain document an siam dawn a ni. Task group tharte hi Disaster Management Act, 2005 tlawhchhana din an ni a, ni tin Chief Secretary hnenah report pe tura tih an ni