Covid-19 donaa hmalakna thlirho
Health minister Dr R Lalthangliana hoin nimin khan Mizoram Legislative Assembly Annexe conference hallah Health department leh a kaihhnawih pawl hrang hrangte'n Covid-19 donaa hma an lak dante leh hmachhawp an neihte sawiho a ni.
Dr R Lalthangliana chuan, health kaihhnawiha thawktu zawng zawng, sorkar leh private-a thawkte tiamin an thawhnaah ṭheuh hneh takin an thawka a hriat thu leh, a hmatáwnga ṭang an nih angin an thawhrimzia leh hahzia a hriatpui thu a sawi.
State Referral Hospital-a medical superintendent Dr HC Laldina chuan, an damdawi-ina Covid-19 vei enkawl mek chu April 4, 2020 aṭangin a khawsik a ziaawm ṭan thu te, a taksaa vital organ (chuap, lung, kal leh a dangte) hnathawh pawh a ṭhat tial tial thute a sawi a, "A test sample ennawn leh turin April 5 khan thawn a ni a, result nghah mek a ni," a ti. Covid-19 vei enkawl tu doctor leh nurse-te chu a inchhâwka an duty avangin
tun thlengin anmahni inah an la haw lo a, an duty zawh veleh ni eng emaw zat damdawi-inah khung hran nghal zel niin, ei leh in turte damdawi-inah buatsaihsak an ni.
Aizawl Civil Hospital medical superintendent Dr Lalhmuchhuaka'n ACH inbuatsaih dan a sawi a; damlo kan phal a nih rih loh thu leh OPD chu khâr ni lo mah se, inentir ṭul zual tak takte tih loh chu inentir rih lo tura an duh thu sawiin, "Doctor-te eng lai pawha phone hmanga râwn theih turin an inring a ni," a ti.