Thlai thar lei hi kut hnathawhtute taimak leh thawhrim zirtir tumna a ni - K Sapdanga

Minister K Sapdanga chuan, sorkarin thlai thar a lei chu sorkarin kut hnathawhtute taimakna leh thawhrimna zirtir a tumna a nih thu leh, a thlawna sem bànsan tura hma an laknain party dangte pawh a kai harh hlea an hriat thu a sawi.

Nimina ZPM pisaa inkhawma thusawitu K Sapdanga chuan, "Thlai thar lei chungchangah hian sorkar chuan kut hnathawhtute taimakna leh thawhrimna zirtir a tum a ni. Sawhthing hmang hian sorkar hi sumdawn a tum lo a, a thlawna sem leh mipuite tihbeidawnna aṭangin mipuite beiseina thar pek a tum zawk a ni," a ti.

Sorkarin sawhthing buaipuina atan sorkar sum vbc 30.51 a seng tawh a, cheng vbc 2 chauh a la hmu let tih sawiin Sapdanga chuan, hmuh let tlem mah se, hlohah an ngai lo a, investment ṭha taka an ngaih thu leh, kalphung ṭha neih theihna tur a nih dawn phawt chuan kut hnathawktute pawhin rilru thar pu se an duh thu a sawi.

K Sapdanga chuan, "A thlawna sem bànsan tura hma kan lakna hian party dangte pawh a kai harh hlein kan hria a, kan lawm hle. Handholding policy hnuaiah CM Special Package kan ruahman a, hei hi vote zawn nan kan hmang ve lo... Mi harsa leh bul ṭanna tur sum leh paia harsatna neite tan a bika ruahman a ni a, project base-a kalpui a ni," a ti.

Assembly budget session neih zawh tak chungchang sawiin Sapdanga chuan, "CM Pu Lalduhoma’n budget speech a khaikhawmna aṭangin siamṭhatna lam hi kan budget laimu a ni tih a lang chiang hle," a ti a; ZPM-in ram dinhmun siamṭhat a tul thu an aupui nasa ṭhin a, chu chu a takin budget-ah a lang niin a sawi.

Home Minister chuan, Mizoram budget tharah sorkarin a hnathawkte inrêlbâwl dan siamṭhat a tum nasa tih a lan thu sawiin, "Sorkar hnathawk zingah rilru dik tak pu, sorkar ṭha neih châk an lo ṭhahnem hle tih kan hmuh hian chakna thar min pe nasa hle... Vawiin thlengin corruption-ah kan la fihlim thei hi kan lawm hle a ni," a ti.

Budget-ah chhiah tih punna a awm lo tih ṭhin chu ramin a ṭhatpui em tih ngaihtuah a ngaih thu sawiin K Sapdanga chuan, "Hei hi kutdawh rilru inputtirna a ni. Mihring mamawh a pun zel laia sum luhna lam tur dan pin hi kalphung dik a ni lo tih kan hriat a ngai. State dang chhiah pek tling khawm ringawta innghah reng chu thil zahthlak a ni," a ti.

K Sapdanga chuan, sorkar tharin huaisen takin sawiselna karah a theih ang angin hma an la tih sawiin, "Chu chuan 15.86% lai kan mamawh a lo phuhru ve dawn ta a, a dang 82% erawh chu state dangte chhiah tling khawm central-in min pek aṭangin kan la dawn tho a ngai," a ti a; chhiah tling khawmte chu kawng siam nan te, sorkar hnathawk lak belh nante leh mipui tan a ṭangkai thei ang bera hman a nih dawn thu a sawi.

Home Minister chuan, chhiah pe tam ram apiang an changkang tih sawiin, "Chhiah âwl duhna rilru kan pu tlat ṭhin hi insiamṭhat kan ngai a, thawhrimna nen he kan ram hi siamṭhat i tum ang u,” a ti bawk.