KHAWTHLIR
END pisa tlawh
Excise & Narcotics joint commissioner (enforcement) Peter Zohmingthanga chuan nimin khan Mamit END pisa a tlawh a, thawktute chu dan hriatna kawngah intuai hriam lehzual tur leh inpekna thûk zawk nen ruihhlo do kawngah theihtawp chhuah turin a chah.
RKS ṭhukhawm
Saitual District Hospital RKS Governing Body chu Dr Lalngura Tlau, bawrhsap kaihhruaiin nimin khan an ṭhukhawm a; April 2024 - February, 2025 chhungin Saitual District Hospital-ah OPD-a inentir mi 14,709, damlo admit 1,175, emergency 4,340, nau piang 118, mitthi 38, nausen thi pakhat leh inzai tênau ti mi 162 an awm.
Nature Tour nei
Nature Learning Centre, Mizoram hnuaia Nature Tour nei tur Champhai district-a GM HSS, Champhai HSS, Eisteins HSS leh, Khawzawl district-a Khawzawl HSS leh Kawlkulh HSS aṭanga zirlai 25 leh official-te chu nimin zing khan Champhai DFO Lalbiakchama Chawngthu-in a vailiam. Zirlaite hian Dampa Tiger Reserve leh Aizawl Zoological Park an tlawh dawn a ni.
Thisen pe
Mizoram Optometrist Association member-te chuan World Optometry Day pualin nimin khan Synod Hospital tan thisen unit 8 an pe a, hmeichhia 5 leh mipa pathum an ni.
Progress partner
Bána Kaih scheme hnuaia Champhai district-a progress partner tura thlante tan nimin khan orientation training buatsaih a ni a; bawrhsap Mohammad Aaquib-in hmanpuiin, progress partner 44-te hnenah partner atana thlan an nihna certificate a hlan.
Thawk ṭha thlang
Nimin khan Lawngtlai DC conference hall-ah February 2025 chhunga 'Road Safety Month' hman pualin lirthei khalhtu leh traffic police thawk ṭhate hnenah lawmman sem a ni. Best maxicab driver atan C Lalropuia, Diltlang South, best taxi driver-ah K Vanlalṭhahlua, Thingkah, best auto rickshaw driver-ah R Lalbiakhnuna, Council Veng leh best traffic police-ah C Lalsiamthara, New Vengpui te thlan an ni.