Serchhip district-ah sawhthing man cheng nuai 2,625 pe tawh

Agriculture minister Pu PC Vanlalruata hoin nimin khan Serchhip District Agriculture Marketing Committee an ṭhukhawm a; Serchhip district-a secondary collection centre (SCC) pasarih aṭangin sawhthing chingtute hnenah sawhthing leina man cheng nuai 2,625 pek a nih tawh thu tarlan a ni.

PC Vanlalruata chuan, thlai hralh dan kalphung mumal tak Mizoramah kalpui tumin sorkarin hma a lak mek thu a sawi a, "A bul kan la ṭan chauh avangin fel lo leh tihsual palh a awm lo thei lo a, kut hnathawktute tan theihtawp chhuaha ke pen zel kan tum. Kum thar lamah chuan hei aia felfai zawka kalpui theih kan beisei," a ti.

February 20, 2025 aṭangin sorkarin sawhthing a lei ṭan thu sawiin Minister chuan, "A thawh hnihnaah chuan support price base-a kalpui tum a ni. Sorkar hnathawkte hahzia ka hriatpui a, loneitute tana thawk in nihna inhria a, ṭhahnemngai takin thawk chhunzawm zel ang che u," a ti a; SCC-te pawh anmahni kea an din theih thuai an beisei thu a sawi.

Ṭhutkhawm hi DAMC chairman Paul L Khuma, bawrhsap-in a kaihruai a; Serchhip DAMC-in harsatna a tawh hrang hrang te, lilam (auction) kalphung chungchanga rawtna thar leh thil pawimawh dangte sawiho a ni.

Tarlan danin, Serchhip district-a SCC pasarihah sawhthing quintal 3,302 hralh tawh a ni a, first instalment-a sum hmuh cheng nuai 2,625 (vbc 2.625) chu loneitute bank account-ah thun a ni tawh. Second instalment hi thun leh mek niin, loneitute zinga bank account fel lo tlem awmte chinfel a ni a, nimin khan thun kim hman beisei a ni.