Aizawlah Tree Growers Mela buatsaih

ICFRE -Bamboo & Rattan Centre (BRC), Aizawl chuan nimin khan Aijal Club Park-ah 'Tree Growers Mela' an buatsaih a, Horticulture minister Prof. Lalnilawma'n a hawng. Mela thupui chu 'The Future is Green: Invest in Trees' tih a ni a, vawiinah chhunzawma zawh a ni ang.

Tree Growers' Mela neih chhung hian mipui en tur leh lei theihin thing leh mau ṭiak te, pangpar leh bonsai hrang hrang pho chhuah a ni a; nimin khan pangpar leh bonsai ching/buaipuitute pualin mithiamte'n composting, pa (mushroom), agroforestry leh forest fenetic resources & tree domestication chungchang an sawifiah.

Prof. Lalnilawma chuan, tun hnaiah tuihna kang chat leh tui thianghlim indiah lohna a awm nual thu a sawi a, "Thing leh mau humhalh lamah kan theihna zawn ṭheuha hma kan lak a ṭulzia a lang chiang hle. Thing phun uarah ringawt duh tawk loin, a puitlin ngei theihna tura enkawl zui a ṭul a, kan tu leh fate tana chenna tlak khawvel kan siam theihna hmanrua a ni," a ti a; thing leh mau humhalh turin mi tin a sawm.

Mela hawnna inkhawm hi ICFRE-BRC scientist-D & head Sahdeep Yadav-in a kaihruai a; khualzahawm Horticulture secretary Ramdinliani leh Aizawl DFO Lalnunsanga Khawlhring bakah, internet kaltlangin ICFRE-RFRI, Jorhat director Dr Nitin Kulkarni ten thu an sawi bawk.