Tlawng lui Reiek kaiah ni záwnin mi an tla hlum

Tlawng lui, Reiek kai bawr velah tun hnai ni záwnin mi an tla hlum a; March 22, 2025 leh a tuk March 23 khan mi pakhat ve ve an tla hlum. Tlang luiah tla hlum an awm leh tak nual avangin YMA, Maubawk Branch chuan Tlawng luia kalte chu fimkhur turin an chah.

YMA, Maubawk Branch tarlan danin, Lalṭanpuia (31) s/o Rolala (L), Nursery Veng, Tlawng road-a awm chu March 22, Inrinni tlai khan Tlawng PHE Row-I tuikhuah chhak deuhah a tla hlum a; hemi zan dar 10:30 velah a ruang hmuh a ni.

March 23, Pathiani pawh khan chhun lamah Laldinthara (31) s/o Lalhmingthanga, Chaltlang Lily Veng chu Tlawng luia Tuithum chhuah thlang Lungpui lian thlang lí-ah a tla hlum a, chawhnu lam dar 15:20-ah a ruang hmuh a ni.

Maubawk Branch YMA chuan, "Tunlai hian khua a lum chho leh mek a, hei vang hian Tlawng leh a chhehvel luiah intihhlim paha ṭhian ho kal an ṭhahnem ṭhin hle. Heng laia líte hi a thûkin chetsual palh hlauhawm tak takte a nih hlawm avangin, he lai hmun tlawhtu mi tinte fimkhur turin kan chah a ni," an ti.