CM hoin Chapchar Kût thlir let a ni

Chapchar Kût Organising Committee chuan an chairman Lalduhoma, chief minister hoin nimin khan CMO conference hall-ah Chapchar Kût 2025 an thlir lêt. CM chuan, "Kût hi kan la hman zel hmel avangin hmasawn zel kan tum tur a ni," a ti.

Chief Minister chuan, hlawhtling taka Chapchar Kût buatsaih a nih thu sawiin, "Thlir letna hunah hian Kût kan hman leh hunah nuam leh hlawhtling zawka kan buatsaih theih dan tur thlir phaka ngaihtuahna kan sen thiam a ṭha a, Kût hi kan la hman zel hmel avangin hmasawn zel kan tum tur a ni," a ti a; nakkum lamah chuan district-te hnena Kût hmanna tur sum pek ṭhin pawh tihpun deuh dan dap ṭha a tih thu a sawi.

Art & Culture minister C Lalsawivunga chuan, Chapchar Kût 2025 chu hlawhtling leh hriatreng tlak nia a hriat thu a sawi a; member secretary Prof. Malsawmliana chuan, Kût hman dan tlangpui a tarlan bakah, kum thar lama Chapchar Kût hman dan tur atana ṭha nia an hriatte an sawiho bawk.

Ṭhutkhawma tarlan danin, Chapchar Kût 2025 hmanna atan budget cheng nuai 149.70 ruahman a ni a, cheng nuai 149.60 vel sen a ni. Sum hmuhna lam hi sorkarin Kût hmanna tur atan budget-ah cheng nuai 100 a dah sa leh sponsor aṭangin nuai 35.91 vel bakah, nikum balance tlema zawng la awmte nen leiba leh sum chuang bang awm loin hman a ni.

Chapchar Kût post souvenir chu Information & Public Relations department bultumin buatsaih zui leh nghal a ni a; April thla tawp lamah tlangzarh theih beisei a ni.