World Water Day hman a ni

Khawvela tui hlutna inzirtirna ni, World Water Day (March 22) chu nimin khan PHE department leh Central YMA ṭangkawp buatsaihin Vanapa Hall-ah hman a ni a, PHE minister Prof. Lalnilawma'n a hmanpui. Kumina Day thupui chu 'Glacier preservation' tih a ni.

PHE Minister chuan, Mizoram hmun hrang hrangah tuihna humhalh turin PHE department-in thehtawpa hma a lak thu sawiin, "PHE hnuaia Village WATSAN Committee-te puihnain thingtlang khaw tinah hmalakna kalpui ṭhin a ni. Hemi hrûlah hian mahni khaw tui lakna hnâr ramngaw humhalh a, khawih chêt phal loh tura khawtlang tana mimal ram pek pawh chhinchhiah danin Mizopa chhiara ṭin 65 leh a chanve lai a ni," a ti.

Prof. Lalnilawma chuan, sik leh sa inthlak danglam nasain nghawng ṭha lo tak tak a neih thu a sawi a; ram kâng vangin Mizoramin a tawrh nasat thu sawiin, kal khawmte chu tuihna humhalh tur leh kângmei laka ramngaw venhim kawngah theihtawp chhuah zel turin a chah.

PHE Minister hian World Water Day puala intihsiakna hrang hrang - reels insiamsiak, hlahril (poetry) inphuahsiak leh auhla (online slogan) inphuahsiak lawmmante a sem a ni.

World Water Day hmanna inkhawm hi PHE secretary Teresy Vanlalhruaii'n a kaihruai a; Central YMA president Lalhmachhuana leh vice president Prof. Lalnuntluanga, PHE engineer-in-chief H Duhkima leh PHE project management unit director Lalropuia te pawhin thu an sawi.