NHM, Mizoramin TB umbo tura hma a laknaah lawmman a dawng

National Health Mission (NHM), Mizoram chuan TB vei awm lohna khua a awm theih nana hma a lak ṭhat vangin March 24, Thawhṭanni khan Vigyan Bhavan, New Delhi-a World TB Day Co­m­me­moration hmannaah 'Exemplary Performance in TB Mukt Gram Pan­chayat Initiative' lawmman a dawng.

Lawmman hi Union Health minister JP Nadda chuan NHM mission director Dr Lily Chhakchhuak hnenah a hlan a, state TB officer Dr Zochhuanawmi'n a ṭawiawm. NHM, Mizoram hian Category B (small state less than 50 lakhs population)-ah lawmman hi a dawng a ni.

Health minister Lalrinpuii chuan NHM-in lawmman a dawng chu lawmawm a tih thu a sawi a, "National TB Elimination Programme (NTEP) thawktu te, doctor leh nurse te, health & wellness officer te, health worker te leh thawktu dangte thawhrimna vang a ni," a ti.

Sorkar thuchhuah tarlan danin, December 7, 2024 aṭang khan Mizorama district pali – Aizawl, Mamit, Serchhip leh Champhaiahte 100 Days TB Campaign kalpui niin, hemi chhung hian mi 61,859 dinhmun endik a ni a, TB vei mi 26 hmuhchhuah an ni.

TB endikna camp hi hmun hrang hrangah vawi 874 neih a ni a, NAAT-a endik mi 4,662, x-ray a en mi 10,886 leh microscopy hmanga sample endik mi 398 an awm. Nutritional Poshan Yojana hi TB damlo zinga mi 1,177 hnenah pek a ni bawk.