Governor-in MZU Convocation a hmanpui; Zirlai 7,724-ten degree an nei thar

Governor Gen. Dr Vijay Kumar Singh chuan nimin khan Mizoram University (MZU) Multipurpose Hall-ah MZU Convocation vawi 19-na a hmanpui. Governor chuan, zirna chu kawng engkima mimal hmasawnna, nunkawng dika zirlaite kaihruaitu tur a nih thu a sawi.

Gen. Dr VK Singh chuan, MZU Convocation vawi 19-na kaltlanga degree, gold medal leh lawmman dawngtute duhsakna a hlan a, "He hunah hian zirnaa hlawhtlinna mai ni lo, ṭanrualna a taka lantirna lawm tura kalkhawm kan ni a, tuna hlawhtlinna kan chante hi hmalam hun atana min kaihruaitu leh chakna min petu nise a duhawm hle ang. Zirna hi academic chauh ni lo, kawng engkima mimal hmasawnna, nunkawng dika zirlaite kaihruaitu tur a ni," a ti a; MZU-in kawng hrang hranga hma a sawn chu lawmawm a tih thu a sawi.

Kum 2001-a Central University a nih hnuah MZU chu Mizoram zirna mai piah lamah hmasawnna thlentu a nih thu sawiin Larsap chuan, "Tun hnaiah Mizoram Assembly-in state pual university dinna tur 'Mizoram State University Bill 2025' lungrual taka a pawm hi a lawmawm hle a, Mizoram University hi kum 2035-ah chuan ngawrh zawka research kalpuina tur university a ni thei dawn," a ti bawk.

Khualzahawm chief minister Lalduhoma pawhin thu sawiin, MZU chu Mizorama zirna sang ber a nih angin zirlai leh researcher-te tan hmasawnna tur thil thar MZU-in a chhawpchhuah sak zel a beisei thu a sawi a, "LLM leh integrated LLB course hawng turin UGC leh Ministry of Education-ah rawtna thlen a ni a, financial approval ngaihchan mek a ni. Mizoram hi kum kha leh chen inthliarna awm lohna a ni a, university leh a hnuaia college hrang hrang thuneitu leh zirlaite hian midang tihduhdah leh diriamna 'ragging' awm lo turin hma la zel ang che u," a ti.

Lalduhoma chuan zirna hmunah inremna leh zawhawmna vawnhim tlat a ṭul thu a sawi a, zirtirtu leh zirlaite chu an kalzelna turah duhsakna hlanin khawtlang leh ram tana mi ṭangkai nih tum turin a fuih bawk.

Mizoram University hi kum 2001-ah din niin, department 37 a awm mek a; centre pahnihin School of Study 10-ah UG, PG leh Ph.D programme an kalpui mek bakah, affiliated college 40 leh constituent college pakhat a nei mek a ni.

Convocation vawi 19-naah hian MZU hnuaia zirlai 7,724 hnenah degree hlan a ni a; nimin convocation-a kal zirlai 1,193 hnenah pek nghal a ni.