BSUP complex-ah ration buhfai an sem

Nimin zing khan BSUP, Edenthar Venga chengte tan a ṭum khatna turin ration buhfai sem a ni a, bialtu MLA K Sapdanga, minister leh Food Civil Supply & Consumer Affairs (FCSCA) minister B Lalchhanzovate'n an hmanpui.

K Sapdanga chuan, awlsam zawka BSUP-a awmte'n ration buhfai an lak theihna chhanah Pathian, FCSCA Minister leh department-te chungah lawmthu sawiin, "Inthlan dawna kan au hla angin, 'BSUP complex- ah ration buhfai sem kan tum ang' kan ti a, rin aiin a kawng a lo hautak a, kum khat vel zet inbuatsaihna atan hun kan hmang a ni," a ti.

FCSCA Minister-in BSUP-a buhfai sem theih dan kawng a zawng ngar ngar tih sawiin K Sapdanga chuan, "Vawiinah a hlawhtlinna kan hmu ta a ni," a ti a, harsatna a awm a nih loh chuan an duh hunah tak sorkarin buhfai phurh thlen sak zel a tum thu a sawi.

FCSCA Minister pawhin thu sawiin, "BSUP kan tihah hian kan duhthlanna vanga awm kan nih ka ring loa, lei rem kan la rah loh avangte leh sorkar building-ah chuan luah man awm mumal loa khawsak a ziaawm zawk beiseia helai hmuna kal khawm hi kan nih ka ring. A project hmingah hian basic service tih hi a awm a, mihring dam khawchhuahna tura sorkarin a mawhphurhna kawng khat tihhlawhtlin ngei hi ka rilruah a awm ṭhin a ni," a ti.

B Lalchhanzova chuan a hmasa atan BSUP, Edenthar-ah bul an ṭan tih sawiin, "Hemi atan hian Supply department-a ka thawhpuite an fakawm hle. Bialtu MLA hi ka fak khawp mai a, ani nena thawk hoin inkawt kaiah ngei buhfai inlak theih nan a phurh man thla tin a tum sak dawn che u a ni," a ti a, sorkar chu mipui ban phaka awm a ngaih thu a sawi.