ZPM ṭhalaiin police leh excise an chhuang

ZPM Ṭhalai chuan thuchhuah siamin, ruihhlo tawlhruk kawnga in phumru mi ṭhenkhatte man chhuak tu Mizoram Police leh Excise & Narcotics department hmalakna chhuanawm an tih thu an tarlang.

Ruihhlo hmansualna avangin Mizo mipui tam takin harsatna an tawk mek tih tarlangin ZPM Ṭhalai chuan, "A phena sum leh paia hlawkna a awm tih hria a, ruihhlo tawlh ruk kawnga inphumru mi ṭhenkhatte man chhuak tura Mizoram Police leh Excise & Narcotics department hmalak mekna hi chhuanawm kan ti a, an hmalak zelna tura theihtawp chhuaha ruihhlo do kawnga chak taka hma an lak zel theih nan duhsakna kan hlan," an ti.

ZPM Ṭhalai chuan Mizoram zimte international leh state dang ramriin a hual vel, ruihhlo tawlh rukna kalkawng a mi ṭhenkhatten an hman mek thu tarlangin, "Mizo ṭhalai tam takten damdawi hman sualna avanga bunna hlu tak an lo chan phah tawh fo bakah, damdawi hman sualnain a tih buai mek ṭhalai tam takte chhan chhuak tura ruihhlo do kawnga sorkar leh kohhran bakah NGO pawl hrang hrangte hmalak mekna hi theihtawp chhuahin kan thlawp tlat zel dawn," an ti bawk.