ALORA - Centre for Wellness hawng

MSACS project director Dr Jane R Ralte chuan nimin khan ICFAI University, Durtlangah 'ALORA - Centre for Wellness' a hawng a; tun hniaia Mizorama HIV kai hmuhchhuah thar zinga 57% chu kum 15-34 inkar an nih thu a sawi.

Dr Jane R Ralte chuan, ṭhalaite zinga HIV/AIDS do kawnga hmalakna tihchak lehzualna tura ruahmanna a awm chu lawmawm a tih thu a sawi a, "Tun hnaia HIV kai hmuhchhuah thar zinga 57% chu kum 15-34 inkar an ni a, heng HIV kai hmuhchhuah tharte zinga 67% vel chu invenna tel loa mipat hmeichhiatna hman aṭanga kai an ni," a ti a, inchiuna hriau thianghlim lo inhmanṭawm aṭanga kai 30% an awm bawk thu a sawi.

'ALORA - Centre for Wellness' hi college zirlaite zinga HIV/AIDS lama hmalak mekna tichak lehzual turin helama hmalatu pawl - SHALOM leh PATH kaihhruaina hnuaiah din a ni. ALORA-ah hian rilru hrisel neih theihna tura counselling-te pein, thisen sang leh zunthlum test-nate nena thuam a ni a, Red Ribbon Club bakah College NSS member-te telin 'mahni dinhmun inhriat nana thisen test' chu an auhla pakhat a ni.

Tarlan danin, March 13, 2023 khan Centre for Disease Control (CDC), USA leh UNAIDS thlazar hnuaiah ALORA Centre hi din a ni a; Govt. Aizawl West College leh Govt. Aizawl North College-ahte din tawh niin, nimin khan ICFAI University-ah hawn belh leh a ni.