NGOCC-in Assam Rifles chhuahsan hmunah Security ruahman vat turin sorkar ngen

NGO Co-Ordination Committee (NGOCC) chuan March 24, Thawhṭanni khan CYMA Office-ah Aizawl khawpui lailia Assam Rifles chhuahsan tur hmunhma hrang hrang chungchang an sawiho a; AR chhuahsan tura hmun ruakte humhalh a nih theih nan security ruahman vat turin sorkar an ngen.

NGOCC chuan thuchhuah siamin, Assam Rifles-te'n an chhuahsan ramte hi mipui tana a ṭangkai thei ang bera hman a nih theih nana theihtawp chhuaha hma la turin sorkar an ngen a, "Mimal, political party, Kohhran leh pawl hrang hrangte mahni hmunhma atana hma la lo turin kan ngen a, he hmun ruak hi venhim a, humhalh vat a ṭul nia a lan avangin security ruahman vat turin sorkar kan ngen," an ti.

Assam Rifles ram luah chhunga mimal LSC nei engemaw zatin mipui hmakhua ngaia an LSC an hlan let chu ropui an tih thu tarlangin NGOCC chuan, "Ropui kan tiin ram leh hnam tana an inpekna kan ngaihlu tak zet," an ti a, LSC nei dangte pawh ram leh hnam tana hlan ve turin an ngen nghal.