Diltlang South-ah chenna in 9 a kang

March 26, Nilaini zanlai khan Diltlang South, Lawngtlai district-ah chenna in pakua, Assam type vek, chhungkaw 17 in an luahlai chu bungraw chuh hman lohin a kang ral.

Vanglaini thudawn danin, kangmei chhuah chhan tak hi hriat a ni loa, Lalchhuanate in aṭanga kangmei hi chhuak ṭan nia hriat a ni. In hi a in hlat lutuk hlawm loa, kangmei chhuah thu hi hriat a nihin a nasat hman tawh em avangin bungraw chuh hman a ni tawh lo.

In pakaw zinga paliah hian dawr siam niin, eichawp dawr pahnih, eichawp leh damdawi dawr pakhat leh thawmhnaw dawr pakhat niin, bungraw chuh hman lohin a kang. Assam type pasarih bakah hian concrete building pakhat, la pin kim loha bungrua an dah ṭhenkhatte a kang.

Kangmei chhuak avang hian thi leh hliam an awm loa, vawk pakhat a kan hlum bakah bike pakhat chu a kang chhe vek.

Nimin chhun lam thleng khan hmun ṭhenkhatah chuan kangmei hi nasa vak loin a la chhuak a, hengte hi khawtlang mipuiin an ṭhelh nghal zel avangin kangmei nasa zawk erawh a chhuak tawh lo.

Kangmei chhuahna hmun hi Lawngtlai DC thupek angin thunei-tute'n nimin khan an enfiah a, kangmei tuartute hnenah hian DC Office chuan CYLA kaltlangin silpaulin an hlan pe a, BDO Office, Bungtlang South pawhin silpaulin paruk an hlan.

Lawngtlai DC chuan kangmei tuartute hnenah hian ṭanpuina pek an nih tur thu a tarlang.