KHAWTHLIR

Health department chuan, pawl leh mimal tlawmngaite'n Covid-19 laka invenna atana kut silna hand sanitiser an siam chhuahte chu quality ṭha leh sorkarin tehfung (standard) a siam te tling ngei tur an nih avangin an siam chhuah quality ṭhat leh ṭhat loh hriat nan Food & Drug Testing Laboratory, Central Medical Store, Zemabawkah emaw RIPANS, Zemabawkah emaw enfiahtir ṭhin turin a ngen.

FCSCA department chuan tunlai hian ration card eng (yellow) leh pâwl (blue) (AAY leh priority household card) neite tan buhfai April quota a thlàwnin an sem mek. Mizoram sorkar chuan APL ration card nei harsa zualte pawh a thlawna ration buhfai pek a tum a, chu'ng mite zawn chhuah hna chu local task force-te kutah a dah. Buhfai a thlâwna semna atan hian labour cess cheng nuai 251 ruahman a ni a, labour cess hi hman belh leh tum a ni bawk. 

Serchhip district magistrate Dr Lalzirmawia Chhangte chuan in sak chungchangah hriattirna a tichhuak a, "Hmun hrang hrangah in sak hna thawk mek an la awm tih hriat a ni a, hei hian sorkar thupek a kalh a ni," a ti. Magistrate chuan, chhiatrupna (disaster) thlen palh hlauhthawnawm theia ngaihte a hmuna endikna report behchhana District Disaster Management Authority-in in sak chhunzawm phalna ziaka a pekte chauh lockdown laiin in sak chhunzawm phal a nih thu a puang a, phalna nei loa in sak mekte chu tàwp nghal turin a hriattir a ni. 

Covid-19 vanga inkhârkhip tawh chhungin Lunglei khawpuia mipuite tan thlai thar chi hrang 40 vel district chhunga khaw 29 aṭangin lak luh a ni tawh. March 28, 2020 aṭanga Supply Chain kalpui aṭangin thlai thar lirthei phur 43 lak luh a ni tawh a, chu chu cheng nuai 22.4 hû a ni. 

 Hnahthial District Disaster Management Authority, District Task Force leh Hnahthial District Hospital-te ruahman angin, Hnahthial district-a company hrang hranga thawktu, labour leh hnam dang inhlawhfa, inkhàrkhip vanga tangkhang mi 580-te chu an chenna hmun (camp) pasarihah April 7-8 chhung khan Health department-a thawktute'n Covid-19 chungchang an zirtir. An hriselna dinhmun an endik nghal a, dinhmun ṭha lo leh ngaihtuahawm an awm lo a ni.

FCSCA department chuan tunlai hian ration card eng (yellow) leh pâwl (blue) (AAY leh priority household card) neite tan buhfai April quota a thlàwnin an sem mek. Mizoram sorkar chuan APL ration card nei harsa zualte pawh a thlawna ration buhfai pek a tum a, chu'ng mite zawn chhuah hna chu local task force-te kutah a dah. Buhfai a thlâwna semna atan hian labour cess cheng nuai 251 ruahman a ni a, labour cess hi hman belh leh tum a ni bawk.